إحنا مين؟

إحنا مشروع لتطوير المزّيكا في مصر

إحنا كنا فكرة من سنين لواحد كان عايز يساعد في تطوير وتحسين المشهد الموسيقي في مصر. كان نفسه يغيّر فكرة الناس عن إيه هي المزّيكا ومين هو الفنان، ويعلّم المجتمع قيمته وازاي يقدّروه.

إحنا كنا فكرة أوسو.

أوسو هو جيتاريست مصري. كفنان، هو لعب وسجَّل مع أكبر وأشهر فنانين في الشرق الأوسط، منهم منير وعمرو دياب وأنغام، وغيرهم كتير. بالإضافة إلى إنه مؤسّس مشارك لفرقة نغم مصري، وكان أحد أعضاء فرقة افتكاسات، ودلوقتي هو عضو في مشروع HOH، وزيها مشاريع تانية مختلفة. أوسو كمان وزّع وسجّل كتير من الإعلانات والبرامج والأفلام الوثائقية والسينمائية.

كرائد، هو مؤسِّس مهرجان SOS Music Festival ٢٠٠٦-٢٠١٠ اللي اتكوّن من ١٩ جزء. المهرجان دا كان السبب الرئيسي في دخول الموسيقى المستقلة وانتشارها في المشهد الموسيقي المصري.

الجامعة الأمريكية في القاهرة دعته يدرّس فيها، وبالفعل درّس لمدة سنتين ونص، وبعد كدة مع إن أوسو علّم نفسه بنفسه وماكانش عنده أي شهادة موسيقية، قدّم واتقبل وحصل علي الماسترز بتاعته من جامعة بركلي، وكان أول خريج يدرس في برنامج الماسترز الصيفي.

في مهرجان SOS Music Festival ٢٠٠٩ أوسو كان وصل لجزء كبير من اللي هو كان شايف إنه لازم يتحقق عشان المشهد الموسيقي ف مصر يتطور. ولكن كان لسه في شوية مشاكل كان عايز يساعد في حلّها، زي صعوبة تعليم المزّيكا، أو إن المجتمع مش متقبل فكرة الفنان الموسيقي كمهني محترف، دا غير أصعب وأكبر مشكلة وهي إن سكان المحافظات خارج المدن الكبيرة زي القاهرة والإسكندرية ماكانوش عارفين يوصلوا للساحة أو يبدؤوا يلعبوا مزّيكا كمهنة مش مجرَّد هواية.

ومن هنا جت فكرة اوصل بالعربي.

إيه هو اوصل بالعربي؟

اوصل بالعربي هو مشروع موسيقي متكامل. هو عبارة عن شبكة اجتماعية موسيقية على الإنترنت بتتيح الفرصة لكل اللي عايز يتعلّم مزّيكا ببلاش من خلال الدروس اللي بيقدّمها أشهر وأهم الفنانين في الساحة الموسيقية في مصر.

بالإضافة إلى إنه المكان اللي فيه كل اللي ممكن تحتاج تعرفه عن المزّيكا في مصر. معلومات عن الفنانين والفرق وقصصهم، وكمان كل الأماكن اللي بتقدّم مزّيكا لايف، وكل الاحتفالات الي موجودة في البلد.

وطبعًا اوصل بالعربي دايمًا هيقول لك مين بيلعب فين وإمتى.

الشبكة دي هي الشبكة الاجتماعية الوحيدة في مصر اللي بتسمح لكل الفنانين إنهم يتعلّموا من بعض ويتبادلوا خبراتهم، وبيديهم الفرصة يتواصلوا بطريقة أسهل وأسرع عشان في المستقبل يكوّنوا تعاونات جديدة بأشكال مختلفة.

أهم حاجة بيقدمها مشروع اوصل بالعربي هي الفرصة لكل المواهب اللي موجودة في المحافظات والأقاليم عشان يتعلموا مزّيكا بجدّ مع أشهر وأحسن الفنانين في مصر، عن طريق برنامج السلم.

السلّم برنامج جديد، وهو المكمّل الأساسي لمشروع اوصل بالعربي، والطريقة اللي إحنا بنساهم بيها في تطوير تعليم المزّيكا في مصر. البرنامج ده بيدّي الشباب الموهوب موسيقيًّا فرصة حقيقية لتحقيق حلمهم، وبيسهّل عليهم إمكانية دخول الساحة الموسيقية في مصر بأقصر وأسرع الطرق، وعلى إيد أشهر وأمهر اللي فيها من فنانين.