أنا مين؟

من وأنا صغير كنت عايز ألعب جيتار، بس ماكنش في فرصة إني أمسكه علشان قالولي في المدرسة إن الجيتار ده بتاع الناس الكبار وماينفعش تبدأ دلوقتي، إلعب أورج لحد ما تكبر وتقدر تمسك جيتار.

لعبت أورج فترة عشان ألعب جيتار، بعدين بدأت الجيتار من إعدادي، لعبت عادي فترة، وبعدين مرة حد سمعني (Paco Di Lucia ) فقلت عايز ألعب فلامنكو.

في الأول التعليم كان إجتهادات شخصية، جبت مناهج من على الإنترنت، كان dvd وكتاب وبشوف التمارين. كنت بسمع كتير وذاكرت، بس ممكن أكون ماشي غلط، ومع الوقت عدّلته.

بعد كده رحت الأوبرا مع الدكتور عماد حمدي، درست معاه فترة وساعدني كتير، ومن الناس اللي ساعدوني كان مدرس على skype، عازف مشهور اسمه (أورهان) تركي عايش في كندا، خدت معاه دروس.

دروس skype كانت كل شهر أو شهرين علشان كانت غالية، والمدرس كان بيقولي إني مش محتاج آخد دروس.

التعليم في مصر كان صعب لأن مفيش عازفين كتير، فانت مش شايف أمثلة تبقى زيها، مفيش مدرسين كتير، مفيش طريقة تعليم مظبوطة، مفيش جيتارات في مصر لو عايز تشتري جيتار.

أنا دلوقتي لسه طالب في الكلية (طب أسنان)، وبلعب في الحفلات بس، بلعب مع (حازم عبدالناصر)، كان معايا في الأوبرا مع دكتور عماد، بنلعب تانجو وفلامنكو وشوية كلاسيك علشان هو لاعب كلاسيك.