أنا مين؟

أنا إسمي نور عاشور ومن إسكندرية بلعب ساكسفون , ومن زمان كان البيت على طول فيه موسيقى, أبويا كان بيعزف ساكسفون, وأنا كنت بلعب باسكت, حصلي اصابة وقعدت في البيت 6 شهور, وأبويا قالي جرب تلعب, جربت وبعدها بشهر طلعت حفلة مع "رسالة" وإنبهرت بالوقفة على المسرح وكملت, وبعدها بفترة إشتركت في مشروع زي ورشة موسيقى لمدة 6 شهور فنانين من مصر والسويد, وإتعرفت على ميزو جمال ساعتها وبعدها بفترة اتنقلت للقاهرة واتعرفت على ناس كتير تانية.

روحت لابويا بقى وقولتله عايز أتعلم, هو راجل أكاديمي فا كان عايزني أتعلم اقرا نوته الأول وأنا كنت عايز اتعلم كده لما بسمع وألعب, فا متفقناش ساعتها وإتعلمت مع الفرقة "رسالة" بنذاكر ونطلع حفلات ونلعب وألعب وحش فا ارجع البيت أذاكر عشان ميبقاش شكلي وحش, وإتعلمت كتير مع "رسالة" وبعدين كملت مع " الدور الأول " والمشروع ده من أهم المشاريع اللي إشتغلت فيها وإتعلمت معاهم حاجات كتير أهمها إني أول مرة سجلت كان معاهم ودخلت إستوديو وسمعت صوتي وعملنا البومين.

وبعدها بدأت أسجل مع المطربين المشهورين, وكان منهم منير ولما سمع التسجيل كلمني عشان عايزني ألعب معاه في الفرقة في الحفلة الجاية وعملت كده فعلا وكنت مبسوط جدا ومن هنا بقي الناس عرفتني.

ولعبت مع تامر حسني ولما قابلته اكتشفت انه شخص ملتزم جدا ومهتم جدا بشغله وبيحاول يطور من نفسه جدا.

بس من زمان بفكر اعمل بروجيكت بتاعي, وفي 2011 قررت اني هاعمل البروجيكت بتاعي خلاص, اللي فيه الساكسفون الألة الأساسية, وكنت بفكر الأول أخليه صولو بروجيكت بس بعد كده حسيت إن مش ده الممتع, وان الممتع إني أشتغل مع باند.

من زمان كانت فكرة إن الناس تروح تتفرج علي فرقة بتلعب موسيقى بس موجودة, بس دلوقتي عشان الموضوع بقى قليل فا كان لازم يتعمل بطريقة تشد الناس اكتر, الموسيقي ممكن يبقى فيها كلمة أو كلمتين عشان بس الناس تفتكرها بيها, بس لو موسيقى بس ممكن الناس متفتكرش اسامي التراكات.

قعدت أشتغل شوية مع موزعين بطريقة معينة لحد ما بقيت أنا بعرف اعمل كده وأعمل موسيقى تشد الناس والباند فيه ناس شاطرة اوي عشان كده الموسيقى غنية.

بعزف مع محمد المنير, و الدور الأول , و مشروع نور , و كراش بووم بانج ومع DJs