إحنا مين؟

من زمان أوي وفيه علاقات متشابكة ما بين الأعضاء: أيمن وتوسي كانوا في مدرسة واحدة (سان مارك)، والاتنين كانوا بيعزفوا هناك، وكان بينضمّ لهم صيام، وأحمد حافظ يعرف أيمن لأنهم كانوا بيلعبوا نفس الرياضة (اسكواش)، وتوسي لأنه ساكن جنب الكلية اللي درس فيها أحمد، وهاني برضه كان في نفس الكلية (فنون جميلة إسكندرية)، وكان فاتح كافيه هناك برضه جنب بيت توسي وهو طالب، هاني بقى يعرف أحمد عن طريق قرايب ليه.

أعضاء الفرقة اختاروا اسم "مسار إجباري" لأنه تريقة على قلة الاختيارات اللي قدام أي حد في بداية حياته، ودعوة لأن كل حد يختار المجال اللي هو موهوب فيه ويقدر يدّي له وقت واهتمام.

من بداية الفرقة في 2005 إلى الآن وهي فرقة مالهاش توجُّهات سياسية، "مسار إجباري" فرقة مزّيكا أولا وأخيرًا، بتقدّم موسيقى وأغاني بتوصف فيها حالات معيَّنة، أغلبنا كمصريين بنمرّ بيها .

مزّيكتهم متميزة لأنها بتناقش مشاكل مجتمعية عن طريق دمج موسيقى الروك والجاز والبلوز مع الموسيقى الشرقية.

والسبب في اختيار النوع ده من المزّيكا هو إن خلفيتهم الموسيقية فيها التنوع ده، كانوا بيسمعوا من زمان فرق الروك الغربية المشهورة وأنواع موسيقى تانية، والموسيقى الشرقية المصرية ادّتهم رصيد ضخم وبُعد فني، فالخليط المتجانس ده طلّع نتيجة الموسيقى اللي نشأوا عليها مع شوية اجتهاد وشغل.

ظهورهم خلال الـ10 سنين اللي فاتوا حصل بالتدريج من غير ما يتعرضوا على الملأ بشكل مفاجئ، فاللي بيسمعهم بيبقى مرتبط بيهم فعلًا، وبرضه ممكن نقول ده بسبب تأثير الموسيقى اللي بيقدّموها فيه.

عملوا ٣ ألبومات، أول ألبوم "اقرا الخبر" سنة ٢٠١٣، كان ألبوم بيوثق مراحل بداية الفريق، بدأ الشغل فيه في ٢٠٠٨. والتاني هو "تقع وتقوم" سنة ٢٠١٥، سبب اختيار اسمه إنه وصف للحالة اللي كانوا عايشين فيها، زي فكرة الشد والجذب، الإحباط والأمل، الليل والنهار، الموت والحياة، وهكذا. والبوستر بتاع الألبوم اللي بيصوّر الحياة المقلوبة بيعني الدنيا مقلوبة باللغة الدارجة، وبيوصف حالة الدربكة وعدم الاتزان، وفي نفس الوقت باين في اسم الألبوم الأمل في تحسُّن الحال، ودي نقطة مهمة.

"مسار إجباري" من أكتر الفرق اللي شاركوا في مهرجانات موسيقية دولية.

من أشهر أعمالهم أغنية "شيروفوبيا" اللي الفيديو كليب بتاعها حقق نجاح من أول نزوله على مواقع التواصل الإجتماعي.

وأخيراً في 2018 بعد 3 سنين نزلوا آخر ألبوماتهم "الألبوم"، الألبوم اتسمى بالاسم ده لأكتر من سبب. بسبب تنوع الموسيقى فيه فماكنوش يقدروا يختاروا اسم أغنية محددة توصف شكل الألبوم. والسبب التاني هو الهاش تاج اللي ظهر قبلها بفترة #الألبوم_فين وهو السؤال اللي كان كل اللي بيحب مسار إجباري بيسألوا في الوقت ده.

أعضاء الفرقة:
هاني الدقاق (غناء وجيتار)
أيمن مسعود (كيبورد)
أحمد حافظ (باص جيتار)
محمود صيام (الكتريك جيتار)
تامر عطا الله (درامز)

الفرقة إبتدت في: 2005-01-01

عدد أعضاء الفرقة: 5